Polisi ya Sri Lanka ivuga ko imirambo 15 irimo n'iy'abana batandatu yabonetse nyuma y'iturika ryabereye ahacyekwa kuba hihishe umutwe w'intagondwa zigendera ku mahame akaze y'idini ya isilamu mu burasirazuba bw'igihugu.
Polisi yanavuze ko mu bapfuye harimo n'abagore batatu, byemezwa ko ari abo mu miryango y'abacyekwa kuba mu mutwe w'intagondwa.
Iryo kozanyaho ryabereye mu mujyi wa Sainthamaruthu, utari kure y'umujyi wari utuwemo na Zahran Hashim ucyekwaho kuba umuyobozi w'itsinda ry'abagabye ibitero byo ku cyumweru gishize cya Pasika.
Abahatuye babwiye BBC ko bumvise igiturika kigakurikirwa n'amasasu mu gihe cy'amasaha menshi.
Muri icyo gihe kandi, abashinzwe umutekano basatse baguye gitumo indi nyubako yo mu mujyi uri hafi aho, aho bavuga ko basanze ibiturika ndetse n'akadege kigurutsa nta mupilote kazwi nka "drone".
Umutekano uracyakajijwe muri Sri Lanka nyuma y'ibitero byo ku cyumweru gishize byahitanye abagera kuri 250 naho abarenga 500 bagakomereka.
Abategetsi bavuze ko byagabwe n'umutwe ugendera ku mahame akaze y'idini ya isilamu uzwi nka National Tawheed Jamath, nubwo umutwe wiyita leta ya kisilamu nawo wavuze ko ari wo wagabye ibyo bitero.
Mu yandi makuru, ubuyobozi bwa Kiliziya Gatolika muri iki gihugu bwatangaje ko bwakuyeho misa zose zo ku cyumweru kugeza bwongeye gutanga irindi tangazo.
Abakuriye Kiliziya Gatolika muri Sri Lanka bavuze ko bafashe iki cyemezo kubera impungenge zuko hashobora kuba ibindi bitero.
Malcolm Ranjith, Museneyeri mukuru w'arkidiyosezi yo ku murwa mukuru Colombo, yavuze ko yabonye inyandiko yatangajwe mbere y'igihe ikubiyemo amakuru y'umutekano iburira ko hashobora kugabwa ibindi bitero.
Yanavuze ko yiyumvise nk'"uwagambaniwe" nyuma yaho bigaragariye ko leta y'iki gihugu yananiwe kugira icyo ikora ku mpuruza zari zatanzwe mbere zishingiye ku makuru y'ubutasi yuko hashoboraga kugabwa ibitero.
© 2026 BBC. BBC ntibazwa ibivuye ku zindi mbuga. Soma ibijanye n'aho duhagaze ku mihora ijana ahandi
Loading comments…